El Principinu es unu d’esus librus que toa la genti tendría de leel lo menus una vés. Primeru, polu cendillu la hestoria. Sin grandis alardis, Antoine de Saint-Exupéry mos jadi tenel querencia de dambus dos presonajis prencipalis. Una hestoria cendilla, de las que llegan a lo más jondu. Y una hestoria de las que siempri mos jadin pensal en qu’otru mó y manera de vivil es posibri, y jasta jadi falta, pos en tó’l libru’l Principinu mos va presentandu a genti que mos muestra que, quiciás, lo qu’agora tenemus comu mú emportanti, en verdá no lo es tantu.

Esti librinu, chicu nel númeru d'hojas peru grandi cuandu lo léis, es unu d’esus librus que gusta leel, d’esus librus qu'a unu siempri l’habría gustáu escribil. Pol esu, cuandu m’ofrecierun el ponelu en la palra los mis padris y agüelus, en la nuestra palra d’El Rebollal, no me lo pensé ni un momentinu. El ponel, en la palra los mis agüelus, un libru tan políu comu ésti era un sueñu cumpríu. Un sueñu al que no le falta responsabilidá, pos cuandu se jadi algu, lo que unu quieri es jadelu lo mejol que se puéa. Y pol esu mesmu lo jadis una vés, y güelvis a lo jechu una vés y otra vés. Y siempri, queriendu honral lo mesmu a los que palrarun asina antis d’hogañu, comu a los que siguin palrandu asina y, comu no puedi sel menus, queriendu tenel el mayol respetu a lo que quería idilmus l’autol.

​

Hi queríu respetal, lo más que hi puíu, el mó y manera tradicional de palral n’El Rebollal, y el mó y manera d’escribil que, antañu José María Gabriel y Galán (que pusu parti de los sus escritus en la palra del Norti d’Estremaúra, mú apaecía a la “palra d’El Rebollal”) y hogañu Ángel Iglesias Ovejero (prencipal investigaol de la nuestra palra, natural de Robrea) mos han mostráu. Sí que m'hi tomaú angunas pequeñas licencias, que no jidun ningunu de dambus dos, comu son el escribil la “s sonora” en metá la palabra comu “-SS-“, y escribil comu una espresión jecha “ye verdá” (en castellanu, “es verdad”, “es cierto”), pa mostral un jechu que, anque raru, sí que hi puíu documental, comu es el usu del “ye” en lugal del “es” (no olviamus a la nuestra vedina, la tia Gora, qu’es a la primera presona a quien se lo oyí idil y de la que tantu apriendimus). Los pruralis femeninus en “-IS” los hi ussáu en los casus documentáus. Y ussal la contración “nel” (en+el), además de la palabra “llionés/llionesa” comu nombri general de la lengua llionesa. Lo demás, comu hi dichu más arriba, no se diferencia muchu del caminu que mos mostrarun los ya mentáus Iglesias Ovejero y Gabriel y Galán.

Pa mí ha síu tó un honol y un pracel passal “El Principinu” a esta nuestra palra d’El Rebollal, el mó y manera que tenemus n’El Rebollal d’ussal la lengua llionesa, n’esti casu lo que los sabius siempri han llamáu “llionés oriental”. Ye verdá que, antis qu’en la palra d’El Rebollal, ya había anguna tradución a otrus de los mó y maneras del llionés, tamién del llionés oriental. No quería olvial el güen trabaju que jidu Antoniu Garríu al ponel el libru en “castúo” (agora mentáu comu “estremeñu”), un trabaju que siempri ha síu un espeju nel que miralsi a la hora d’escribil y de defendel las palras “olviás” comu esta nuestra palra d’El Rebollal.

Pol tó ellu, quería dedical esti trabaju, además de a la mi genti, a toa la genti qu’un día, y al sotru día, y tolus días defiendin que estas palras “olviás” sigan vivas. Tamién a toa la genti que mos dejó d’herencia la nuestra palra llionesa d’El Rebollal, a toa la genti que la palró antañu (entri los qu’estuvun los mis agüelus), a toa la genti que la palra hogañu y a toa la genti que, de seguru, la palrará nel futuru, pos estoi seguru que la nuestra palra seguirá viva muchus añus.

José Benito Mateos Pascual

Peñaparda, Veranu del 2021